អ្នកម្តាយមួយចំនួនមានការបារម្មណ៍ ពីការចាញ់កូនមែនទេ?

ខាងក្រោមនេះជាព័ត៌មានដែលមានប្រយោជន៍សម្រាប់អ្នកម្តាយទាំងអស់ ជាពិសេសក្នុងតំណាក់កាលនៃការមានផ្ទៃពោះលើកដំបូង!

ប្រសិនបើអ្នកមានផ្ទៃពោះដំបូង អ្នកទំនងជានឹងជួបប្រទះការចាញ់កូននៅពេលណាមួយ ព្រោះអាការៈនេះកើតមានចំពោះស្ត្រីដែលមានផ្ទៃពោះច្រើនជាងពាក់កណ្តាលនៅក្នុងសាកលលោក។ អាការៈចាញ់កូន ពាក់ព័ន្ធនឹងការ ឈឺក្បាល វិលមុខ ចង្អោរ និងក្អួត អស់កម្លាំង ជាដើម ដែលជាធម្មតាកើតឡើងក្នុងត្រីមាសទី១ ហើយអាការៈនេះមិនតែងតែមាននៅពេលព្រឹកនោះទេ។

មូលហេតុ ដែលនាំឱ្យមានអាការៈដូចបានរៀបរាប់ខាងលើ អាចនៅពេលដែលអ្នកធុំក្លិនអាហារ ឬក្លិនក្រអូប ការបរិភោគអាហារ (ជាពិសេសអាហារហឹរ) កំដៅនិង នឹងការបញ្ចេញទឹកមាត់ធ្ងន់ធ្ងរ ជាដើម។

ទោះបីជាមូលហេតុនៃការចាញ់កូននេះមិនមានភាពច្បាស់លាស់ក៏ដោយ ប៉ុន្តែការចាញ់កូនអាចទាក់ទងនឹងការកើនកម្រិតអ័រម៉ូនច្រើនភ្លាមៗនៃក្នុងរាងកាយរបស់អ្នក។ ទោះបីជាការចាញ់កូនជាធម្មតាបាត់ទៅវិញនៅពាក់កណ្តាលអាយុនៃការមានផ្ទៃពោះរបស់អ្នកក៏ដោយ ក៏រោគសញ្ញារបស់វាអាចរារាំង និងរំខានដល់សកម្មភាពប្រចាំថ្ងៃដែរ។  

តើអ្នកត្រូវធ្វើដូចម្តេច?

មានស្ត្រីខ្លះមានកម្រិតនៃការចាញ់កូនធ្ងន់ធ្ងរ​ ដែលគេហៅថា hyperemesis gravidarum មានន័យថា ការចាញ់កូនក្នុងកម្រិតធ្ងន់ធ្ងរ ។ វាមានរយៈពេលយូរជាងការចាញ់កូនធម្មតា ហើយនាំឱ្យស្ត្រីខ្សោះជាតិទឹក និងស្រកទម្ងន់។ លក្ខខណ្ឌនេះតម្រូវឱ្យស្ត្រីពិគ្រោះយោបល់ជាមួយអ្នកផ្តល់សេវានៅមន្ទីរពេទ្យ ឬគ្លីនិកជំនាញ។ ទោះជាយ៉ាងណា ក៏មានឱសថ និងវិធីព្យាបាលមួយចំនួនដែលអ្នកអាចព្យាយាមកម្ចាត់អាការៈចាញ់កូន ឬអាចសម្រាលអាការៈបាន។  

អ្នកអាចសាកល្បងនឹងវិធីមួយចំនួនដែលបានរៀបរាប់នៅខាងក្រោមនេះ៖

១. បន្ថែមជាតិទឹក៖ សម្រាប់​ស្ត្រី​មួយចំនួន ការ​ញ៉ាំ​អាហារ ឬ​ធុំក្លិន​អាហារ​ធ្វើ​ឱ្យមានអាការៈ​ចាញ់កូន​កាន់តែ​ធ្ងន់ធ្ងរ ។ ការ​ក្អួត​អាច​ធ្វើឱ្យ​រាងកាយ​របស់​អ្នក​បាត់បង់​ជាតិ​ទឹក​។ របបអាហារគួរតែរាវ នឹងផ្តល់សារធាតុចិញ្ចឹមមួយចំនួនដែលអ្នកត្រូវការ រហូតអាចធ្វើឱ្យអ្នកមានអារម្មណ៍ស្រួល ក្នុងការទទួលទាន។ ភេសជ្ជៈ រាវ​ថ្លា​ងាយ​រំលាយ ​មិន​ដាក់​សម្ពាធ​បន្ថែម​លើ​ក្រពះ​របស់​អ្នកគឺជាជម្រើសល្អបំផុត។ ហេតុនេះ ស្ត្រី​មាន​ផ្ទៃពោះ​គួរ​ទទួលទានភេសជ្ជៈ (ជាពិសេសទឹក) យ៉ាងតិច​ប្រាំបី​កែវ​ក្នុង​មួយ​ថ្ងៃ។ តែអ្នកមិនគួរទទួលទានប្រភេទភេសជ្ជៈដែលមានជាតិស្ករឡើយ ។ អ្នកអាចសាកល្បងជាមួយនឹង៖

• ទឹកលាយជាមួយទឹកក្រូចឆ្មា
• ទឹកផ្លែឈើស្រស់ (គ្មានការបន្ថែមស្ករ)
• ទឹកដែលមានសារជាតិអេឡិចត្រូលីត
• ទឹកលាយជាមួយខ្ញី
• ទឹករ៉ែ ឬទឹកសូដា ជាដើម

ម៉្យាងទៀត អ្នកអាចសាកល្បងញ៉ាំចាហ៊ួយ ឬជញ្ជក់ការ៉េមរសជាតិផ្លែឈើ ទឹកផ្លែឈើ កក ឬការ៉េមទឹកដោះគោជូជាដើម។

សូមចៀសវាង ភេសជ្ជៈដែលមានជាតិអាស៊ីតខ្ពស់ ព្រោះវាអាចធ្វើឱ្យក្រពះរបស់អ្នករលាក និងធ្វើឱ្យអាការៈចាញ់កូនបស់អ្នកកាន់តែអាក្រក់។

២. បន្ថែម វីតាមីនបេ៦ (B6)

វីតាមីនបេ៦ ឬ pyridoxine ជាសារជាតិដែលរលាយក្នុងទឹក។ វា​មាន​ក្នុង​អាហារ​ជា​ច្រើន តែអ្នក​ក៏​អាច​លេបឬទទួលទាន​អាហារបំប៉ន​បន្ថែម​បាន​ដែរ។ ការទទួលទានបញ្ចូលគ្នារវាង វីតាមីនបេ ៦ ជាមួយនឹង Doxylamine ត្រូវបានគេជឿជាក់ថាអាចបន្ថយ ការចង្អោរ និងក្អួតចំពោះស្ត្រីមានផ្ទៃពោះ បានដល់70% និងរក្សាអត្រាទាបនៃការមកសម្រាកនៅមន្ទីរពេទ្យ។

៣. ទទួលទានខ្ញី

ខ្ញីមានការទទួលស្គាល់យ៉ាងទូលំទូលាយថាជាផ្នែកមួយនៃឱសថ រួមទាំងការកាត់បន្ថយអាការៈចង្អោរផងដែរ។ ការសិក្សាបង្ហាញថា ការទទួលទានទឹកស៊ីរ៉ូ ឬម្សៅខ្ញីក្នុងទម្រង់ជាថ្នាំគ្រាប់ជួយកាត់បន្ថយការចង្អោរ និងក្អួតអំឡុងពេលមានផ្ទៃពោះ។អ្នកក៏អាចសាកល្បងផលិតផលខ្ញីផ្សេងទៀតដូចជា៖

• តែខ្ញីធ្វើដោយម្សៅខ្ញី ឬខ្ញីស្រស់
• ស្រាបៀរខ្ញីដែលគ្មានជាតិអាល់កុល
• ដំណាប់ខ្ញី
• អាហារសម្រន់រសជាតិខ្ញី
• ទឹកដែលមានលាយ ឬត្រាំខ្ញី

ទោះបីជាមានស្ត្រីមួយចំនួនបានរាយការណ៍ថា ការញាំខ្ញីមានការក្រហាយ ឬក្តៅក្នុងទ្រូង ឬច្រាលទឹកនៅពេលទទួលទានខ្ញីក៏ដោយ ការ ប្រើប្រាស់ខ្ញីដើម្បីព្យាបាលអាការៈចាញ់កូន មានសុវត្ថិភាព និងប្រសិទ្ធភាពបំផុត។

៤. ការប្រើឱសថ

ប្រភេទថ្នាំ Antiemetic ជាច្រើនប្រភេទ (ប្រឆាំងនឹងការចង្អោរ និងប្រឆាំងនឹងការក្អួត) មានសុវត្ថិភាពក្នុងការប្រើអំឡុងពេលមានផ្ទៃពោះ។ ទោះយ៉ាងណា មានថ្នាំមួយចំនួនដែលមិនមានព័ត៌មានសុវត្ថិភាពគ្រប់គ្រាន់ ឬអាចបង្កគ្រោះថ្នាក់។ ឧទាហរណ៍ Ondansetron មានប្រសិទ្ធភាពខ្ពស់ក្នុងការទប់ស្កាត់ការចង្អោរ និងក្អួត ប៉ុន្តែវាក៏អាចជះឥទ្ធិពលដល់បញ្ហាចង្វាក់បេះដូងផង ជាពិសេសសម្រាប់អ្នកដែលមានជំងឺបេះដូង។ វាក៏អាចមានគ្រោះថ្នាក់ដល់ទារកផងដែរ ជាពិសេសប្រសិនបើផ្ទៃពោះស្ថិតក្នុងត្រីមាសដំបូង។ ដូច្នេះ​ស្ត្រី​មាន​ផ្ទៃពោះ​គួរតែ​ពិគ្រោះ​ជាមួយ​គ្រូពេទ្យ​មុន​នឹង​ប្រើ​ប្រភេទថ្នាំណាមួយ​។

៥. ទទួលទានអាហារប្រភេទអាហារប្រភេទងាយរលាយ

ស្ត្រីជាច្រើនដែលមានការចាញ់កូនជ្រើសយកជម្រើសរបបអាហារ BRAT (ចេក, អង្ករ, ផ្លែប៉ោម, នំបុ័ងអាំង) ជារបបអាហារមានប្រយោជន៍។ ប្រសិនបើអ្នកពិបាកទទួលទាន ប្រភេទអាហារដែលមានជាតិម្សៅទាំងនេះអាចជួយសម្រួលអ្នកឱ្យត្រលប់ទៅរបបអាហារធម្មតារបស់អ្នកវិញ។ ទោះជាយ៉ាងណាក៏ដោយ អ្នកមិនគួរ ទទួលទានប្រភេទអាហាររឹងគ្រប់ប្រភេទ ជាពិសេសស្ត្រីដែលមានអាការៈក្អួតញឹកញាប់។  នៅពេលដែលការក្អួតរបស់អ្នកឈប់ អ្នកអាចសាកល្បងរបបអាហារនេះបាន។ អ្នកមិនត្រូវប្រកាន់ខ្ជាប់ទទួលទានអាហារទាំងបួនមុខនេះទេ។ អ្នក​ក៏​អាច​សាកល្បង​អាហារ ​ដូច​ជា នំស្រួយ មី ដំឡូង និងបាយ។ នៅពេលដែលអ្នកបាត់អាការៈទាំងនេះហើយ សូមចាប់ផ្តើមមកទទួលទានអាហារ បន្លែ និងផ្លែឈើវិញតាមធម្មតា។

ពេលណាអ្នក ត្រូវទៅជួបគ្រូពេទ្យ?

ជាទូទៅករណីចាញ់កូនភាគច្រើន ចាប់ផ្តើមស្រាល ឬបាត់ទៅវិញនៅពាក់កណ្តាលនៃការមានផ្ទៃពោះរបស់អ្នក។ ប៉ុន្តែ​អ្នក​គួរ​ពិគ្រោះជាមួយ​វេជ្ជបណ្ឌិត ឬអ្នកផ្តល់សេវាជំនាញ​របស់​អ្នក​ប្រសិន​បើ​អ្នក​មាន​រោគ​សញ្ញា​ដូច​ខាង​ក្រោម៖

• ចង្អោរ ឬក្អួតរបស់អ្នកធ្ងន់ធ្ងរ
• ទឹកនោមតិចតួច ឬមានពណ៌ដិត ឬក្រម៉ៅ
• អ្នកមិនអាចទទួលទានសារធាតុរាវបាន
• អ្នកវិលមុខ ឬដួលសន្លប់ បន្ទាប់ពីក្រោកឈរ
• បេះដូងរបស់អ្នកដើរលឿនខ្លាំង

ប្រភព​៖ WebMD