ការឆ្លងកាត់ការផ្លាស់ប្តូរនៃវ័យពាក់កណ្តាលជីវិត ពិតជាបង្កឱ្យមានភាពតានតឹងយ៉ាងពិតប្រាកដ ហើយយើងគ្រប់គ្នាសុទ្ធតែចង់កាត់បន្ថយភាពតានតឹងទាំងនោះចេញពីជីវិត។ ភាពតានតឹងក៏អាចជារឿងវិជ្ជមាន ដែលជួយឱ្យយើងមានការប្រុងប្រយ័ត្នជាប់ជានិច្ច។ ទោះជាយ៉ាងណា វានឹងក្លាយជាអវិជ្ជមាន នៅពេលដែលយើងប្រឈមមុខនឹងបញ្ហាឥតឈប់ឈរដោយគ្មានការសម្រាក។ ការកើនឡើងនូវភាពតានតឹងក្នុងរាងកាយ អាចបង្កជាបញ្ហាសុខភាពជាច្រើនដូចជា ឈឺក្បាល ឈឺពោះ លើសឈាម ឈឺទ្រូង និងបញ្ហានៃការគេង។

សម្រាប់ស្ត្រីដែលមានអាយុលើសពី ៥០ ឆ្នាំ ផលប៉ះពាល់នៃភាពតានតឹងរ៉ាំរ៉ៃនឹងកាន់តែធ្ងន់ធ្ងរ។ រាងកាយរបស់អ្នកលែងរឹងមាំដូចមុនទៀតហើយ ដូច្នេះវាត្រូវការការថែទាំឱ្យបានល្អជាងមុន តាមរយៈរបៀបរស់នៅដែលមានសុខភាពល្អ ដើម្បីជួយខ្លួនឯងឡើងវិញ។ សូមទទួលស្គាល់ការពិតថា វាដល់ពេលដែលត្រូវកាត់បន្ថយភាពតានតឹងហើយ។

លោកវេជ្ជបណ្ឌិត Charles Raison សាស្ត្រាចារ្យផ្នែកចិត្តសាស្រ្តនៅសាកលវិទ្យាល័យ Wisconsin-Madison បានលើកឡើងថា កូនសោរឆ្ពោះទៅរកការកាត់បន្ថយភាពតានតឹង និងសុភមង្គលកាន់តែខ្លាំង មិនមែនជាលុយកាក់ ឬសម្ភារឡើយ។ អ្វីដែលសំខាន់គឺ សកម្មភាពវិជ្ជមាន សុខភាពល្អ ទំនាក់ទំនងល្អ និងការមានសុទិដ្ឋិនិយម។

របៀបកាត់បន្ថយភាពតានតឹង និងការបង្កើតតុល្យភាពផ្លូវចិត្ត

• ហាត់ប្រាណឱ្យបានទៀងទាត់៖ ការហាត់ប្រាណជួយកាត់បន្ថយភាពតានតឹង កែលម្អអារម្មណ៍ និងបង្កើនសុខភាពទូទៅ។ វាក៏ជួយឱ្យអ្នកគេងលក់ស្រួលផងដែរ។

• បង្កើតប្រព័ន្ធគាំទ្រ៖ សម្រាប់មនុស្សមួយចំនួន ការចូលរួមក្នុងសហគមន៍សាសនាជួយកាត់បន្ថយភាពតានតឹង។ សម្រាប់អ្នកផ្សេងទៀត វាអាចជាការចូលរួមក្នុងក្លឹបហែលទឹក ឬក្រុមហាត់ប្រាណ ឬរៀនជំនាញនានា។ ទោះជាអ្នករកឃើញទំនាក់ទំនងនេះនៅទីណាក៏ដោយ មិត្តភាពដែលរឹងមាំនឹងជួយឱ្យអ្នកមានអារម្មណ៍កក់ក្តៅ មានសុវត្ថិភាព និងមានការផ្សាភ្ជាប់។

• រក្សាអាកប្បកិរិយាវិជ្ជមាន៖ សូមស្វែងរកចំណុចវិជ្ជមានក្នុងបញ្ហា និងស្វែងរកដំណឹងល្អៗ។ កត់ត្រានូវអ្វីដែលអ្នកចង់អរគុណ (Gratitude list)។

• លះបង់ចោលនូវរឿងអវិជ្ជមាន៖ ចូរទទួលយកថាមានរឿងរ៉ាវមួយចំនួនដែលអ្នកមិនអាចគ្រប់គ្រង  បាន។

• មានភាពថ្លៃថ្នូរ ជាជាងការបង្កជម្លោះ៖ ជំនួសឱ្យការខឹងសម្បារ ការការពារខ្លួនខ្លាំងពេក ឬការនៅស្ងៀម ចូររៀនបញ្ចេញអារម្មណ៍ មតិយោបល់ ឬជំនឿរបស់អ្នកដោយត្រង់ទៅត្រង់មក និងប្រកប ដោយការគោរព។

• ស្វែងរកវិធីសម្រាកកាយ៖ រៀនធ្វើសមាធិ។ សាកល្បងប្រើប្រាស់កម្មវិធី (App) សម្រាកអារម្មណ៍ ឬស្តាប់តន្ត្រី។

• បង្កើតចំណាប់អារម្មណ៍ថ្មីៗ៖ ការមានស្មារតីចង់សាកល្បងអ្វីដែលប្លែក អាចជួយអ្នកកាត់បន្ថយភាពតានតឹង។ ចូរធ្វើតាមក្តីស្រមៃរបស់អ្នក ស្វែងរកអ្វីដែលអ្នកចូលចិត្តខ្លាំង ឬរកចំណូលចិត្តថ្មីៗ និងបញ្ចេញភាពច្នៃប្រឌិត

• សម្រាក និងគេងឱ្យបានគ្រប់គ្រាន់៖ នៅពេលអ្នកស្ថិតក្រោមសម្ពាធ រាងកាយត្រូវការពេលវេលាដើម្បីងើបឡើងវិញ។ ចូរផ្តល់ការសម្រាកដែលល្អមួយ។

• បរិភោគអាហារដែលមានជីវជាតិចម្រុះ និងមានតុល្យភាព៖ រាងកាយត្រូវការអាហារូបត្ថម្ភល្អដើម្បីប្រឆាំងនឹងផលប៉ះពាល់នៃភាពតានតឹង។ ម្យ៉ាងទៀត កុំប្រើប្រាស់គ្រឿងស្រវឹងដើម្បីបំបាត់ការព្រួយបារម្ភឱ្យសោះ។

• ធ្វើការងារស្ម័គ្រចិត្ត៖ នៅពេលអ្នកប្តេជ្ញាជួយអ្នកដទៃ អ្នកនឹងរកឃើញគោលបំណងក្នុងជីវិត។ វាជួយឱ្យអ្នកឈប់ផ្ដោតខ្លាំងតែលើខ្លួនឯង ហើយទទួលបាននូវអារម្មណ៍ជោគជ័យ និងមោទកភាព។

កុំបណ្តោយឱ្យពិភពលោកដ៏មមាញឹកនេះមកគ្រប់គ្រងលើអ្នកបាន។ ចំណាយពេលបន្តិច សាកល្បងអនុវត្តគន្លឹះទាំងនេះ ដើម្បីកាត់បន្ថយភាពតានតឹងរបស់អ្នក។

ប្រភពអត្ថបទ៖ WebMD