អ្នកណាជាក្រុមគោលដៅលាក់មុខ ហើយប្រឈមខ្ពស់នឹងការឆ្លងមេរោគអេដស៍?
ក្រុមគោលដៅលាក់មុខជាក្រុមប្រឈមមុខខ្ពស់ក្នុងការឆ្លងមេរោគអេដស៍ កាមរោគ ហើយក្រុមនេះពិបាកទាក់ទងឱ្យមកទទួលសេវាអប់រំ និងធ្វើតេស្ត។ អ្នកទាំងនេះជាក្រុមបុរសរួមភេទជាមួយបុរស ឬអ្នកប្លែងភេទ ដែលធ្វើការក្នុងវិស័យរដ្ឋ ឯកជន ជាសិស្ស ឬនិស្សិតជាដើម។
ក្រុមបុរសរួមភេទជាមួយបុរស ឬក្រុមអ្នកប្លែងភេទ បានជ្រើសរើស និងនិយមប្រើ App Grindr ឬ Blued ដែលបច្ចុប្បន្ននេះដូរឈ្មោះមកជា HEESAY ដើម្បីស្វែងរកដៃគូរួមភេទ។
បើតាមរបាយការណ៍របស់ IBBS (Integrated HIV Bio-Behavioral Surveillance Survey-2023) ឆ្នាំ២០២៣ ប្រេវ៉ាឡង់នៃការឆ្លងមេរោគអេដស៍នៅមានអត្រាខ្ពស់សម្រាប់ក្រុមបុរសរួមភេទជាមួយបុរស(MSM) ៥,៥% ក្រុមអ្នកប្លែងភេទ(TG) ១៣,៥% ខណៈស្រ្តីបម្រើការនៅសេវាកម្សាន្តមាន៤,៩%។
មូលហេតុចម្បងនៃការលាក់អត្តសញ្ញាណត្រូវបានកត់សម្គាល់ថា នៅតែទាក់ទងនឹងភាពភ័យខ្លាច ការមាក់ងាយ និងការរើសអើងក្នុងសង្គម។ ភាពខ្មាសអៀនចំពោះអ្នកដទៃ និងការខ្លាចបាត់បង់កិត្តិយស ព្រោះពួកគាត់ជាអ្នកធ្វើការមានគេស្គាល់ច្រើន សិស្ស និស្សិត និងអ្នកខ្លះមានភរិយា និងកូនទៀតផង គឺជាការអះអាងរបស់ពួកគាត់តាមរយៈក្រុមការងាររបស់អង្គការរ៉ាក់។ ឥរិយាបថរួមភេទដោយប្រថុយប្រថានមួយចំនួនដូចជាការមិនចូលចិត្តប្រើស្រោមអនាម័យ និងចូលចិត្តរួមភេទជាក្រុម ដោយប្រើថ្នាំជំនួយផ្លូវភេទ ឬថ្នាំញៀនក៏ជាកត្តាជំរុញបន្ថែមក្នុងការឆ្លងរាលដាលយ៉ាងឆាប់រហ័សនៃមេរោគអេដស៍ ក្នុងចំណោមក្រុមគោលដៅលាក់មុខទាំងនេះ។
ដើម្បីស្វែងរកក្រុមគោលដៅជា MSM ឬ TG ដែលលាក់អត្តសញ្ញាណបែបនេះ ក្រុមការងារអង្គការរ៉ាក់ បានប្រើប្រាស់ App ទាំងពីរខាងលើដើម្បីផ្ដល់ការអប់រំ និងណែនាំឱ្យទទួលសេវាតេស្តឈាមរកមេរោគអេដស៍ មេរោគស្វាយ ដោយស្ម័គ្រចិត្ត និងរក្សាការសម្ងាត់។ ការប្រើប្រើប្រាស់App សម្រាប់ទាក់ទងក្រុមគោលដៅជាយន្តការមួយក្នុងចំណោមយន្តការផ្សេងទៀតរបស់ថ្នាក់ជាតិ ក៏ដូចជាម្ចាស់ជំនួយដើម្បីជំរុញការអប់រំ និងធ្វើតេស្តដល់ក្រុមគោលដៅឱ្យបានកាន់តែច្រើន ពិសេសក្រុមលាក់មុខ។
ក្រុមការងារបានផ្ញើសារទៅកាន់អ្នកប្រើប្រាស់ App ទាំងពីរនោះដោយណែនាំខ្លួន និងស្ថាប័ន ក្នុងន័យឱ្យក្រុមគោលដៅមានទំនុកចិត្តក្នុងការសន្ទនាជាមួយ។ ក្រៅពីការបង្ហាញអត្តសញ្ញាណរបស់ខ្លួន បុគ្គលិករ៉ាក់ត្រូវមានចំណេះដឹងទាក់ទងនឹងមេរោគអេដស៍ កាមរោគ សុខភាពផ្លូវភេទ សុខភាពបន្តពូជ ច្បាស់លាស់ ហើយអាចឆ្លើយតបនូវសំណួរ និងបញ្ហារបស់ក្រុមគោលដៅបាន ទើបអាចទទួលបានការទុកចិត្តពីអ្នកទាំងអស់នោះ។
ក្រៅពីទាក់ទងក្រុមគោលដៅតាម App បុគ្គលិករ៉ាក់ក៏បានប្រើប្រាស់បណ្ដាញសង្គមដូចជាហ្វេសប៊ុក តិកតុក និងតេឡេក្រាម ក្នុងការបញ្ជ្រាបសារអប់រំ និងជំរុញលើកទឹកចិត្តក្រុមគោលដៅផ្សេងទៀតឲ្យមកធ្វើតេស្ត ទទួលយកស្រោមអនាម័យ និងថ្នាំប្រឹពផងដែរ។
ការនិយាយលើកទឹកចិត្ត ការផ្ដល់ចំណេះដឹង និងការបង្ហាយការវិការជាអ្នកជួយរបស់បុគ្គលិករ៉ាក់បានធ្វើឱ្យក្រុមគោលដៅយល់ពីសារសំខាន់នៃការធ្វើតេស្តដើម្បីដឹងពីស្ថានភាពខ្លួនបានទាន់ពេលវេលា។ ការដឹងពីស្ថានភាពខ្លួនជួយឱ្យក្រុមគោលដៅអាចជ្រើសរើសវិធីការពារខ្លួនពីមេរោគអេដស៍ និងកាមរោគ ដោយប្រើថ្នាំប្រឹព និងស្រោមអនាម័យ ឬបើមានប្រតិកម្មមេរោគអេដស៍អាចទទួលបានការព្យាបាលទាន់ពេលវេលាមិនបណ្ដាលឱ្យធ្លាក់ខ្លួនឈឺពីជំងឺឱកាសនិយមផ្សេងៗ។
មតិយោបល់