ចំណេះដឹងសុខភាពទាក់ទងនឹងបញ្ហាគភ៌គំរាមរលូត
យើងសង្កេតឃើញថា រហូតមកដល់ពេលបច្ចុប្បន្ននេះ បញ្ហាគភ៌គំរាមរលូតនៅតែចោទជាបញ្ហាចំបង
ចំពោះស្រ្តីដែលមានផ្ទៃពោះ ព្រោះវាក៏អាចគ្រោះថ្នាក់ទៅដល់អាយុជីវិតស្រ្តីជាម្តាយផងដែរ ប្រសិនបើគាត់ខ្វះចន្លោះក្នុងការព្យាបាល និងការតាមដានពិនិត្យផ្ទៃពោះឱ្យបានដិតដល់។ នៅលើសកលលោក ការគំរាមរលូត កើតមានប្រហែល ២០ ទៅ៣០ភាគរយនៅក្នុងអំឡុងពេល២០សប្តាហ៍នៃអាយុគភ៌។ ប៉ុន្តែប្រហែល ៥០ភាគរយនៃការគំរាមរលូតទាំងនេះ ស្រ្តីអាចបន្តការពពោះរហូតដល់គ្រប់ខែ ដោយមាន ឬ មិនមានការ ព្យាបាល ប្រសិនបើគ្មានសញ្ញាអ្វីប្លែក។
តើយើងអាចដឹងអាការៈនៃការគំរាមរលូតយ៉ាងដូចម្តេច?
ការគំរាមរលូត គឺជាការធ្លាក់ឈាមតាមទ្វារមាសដែលអាចកើតមាននៅអំឡុងពេលចាប់ផ្តើមមានគភ៌រហូតដល់សប្តាហ៍ទី ២០នៃគភ៌ក្នុងផ្ទៃ។ ការធ្លាក់ឈាមនេះអាចរួមផ្សំជាមួយនឹងការឈឺចុកចាប់ក្នុងពោះ ដែលជាសញ្ញាបញ្ជាក់ពីការគំរាមរលូត ឬអាចឈានទៅរកការរលូតផងដែរ។
តើការគំរាមរលូតបណ្តាលមកពីមូលហេតុអ្វី ហើយវាអាចនាំឱ្យមានកត្តាប្រឈមអ្វីខ្លះ?
មូលហេតុក៏ដូចជាកត្តាប្រឈម សំខាន់ៗដែលអាចបង្កឲ្យមានបញ្ហាគំរាមរលូត រួមមាន៖
- ការពិសារស្រា ឬ បារី
- ភាពមិនប្រក្រតីនៃកត្តាហ្សែន ឬក្រូម៉ូសូម
- ការឆ្លងរោគនូវ ពពួកបាក់តេរី ឬ ពពួកវីរុសក្នុងអំឡុងពេលពពោះ
- គ្រោះថ្នាក់ ឬ ការប៉ះទង្គិច ចំផ្នែកណាមួយនៃពោះ
- អាយុម្តាយច្រើនលើសពី ៣៥ឆ្នាំ
- ការលើសគីឡូច្រើន
- ការប្រើប្រាស់ថ្នាំគ្មានវេជ្ជបញ្ជា ឬប៉ះពាល់ដោយសារធាតុគីមីផ្សេងៗ
- មានជំងឺប្រចាំកាយដូចជា ជំងឺលើសឈាម ជំងឺទឹកនោមផ្អែម ជំងឺក្រពេញពកក ។ល។
បញ្ហាដែលបានរៀបរាប់ខាងលើនេះ មិនមានជាកត្តាជំរុញ ចម្បងច្បាស់លាស់ទៅលើការគំរាមរលូតកូនទាំងស្រុងនៅឡើយទេ។ ហើយ គេក៏សង្កេតឃើញថា ការធ្វើការងារធ្ងន់ និងការកង្វះចំណីអាហារ ក៏ជាកត្តាជំរុញបន្តិចបន្តួចលើការគំរាមរលូតផងដែរ។
៣-រោគសញ្ញា និងរោគវិនិច្ឆ័យ
ជាទូទៅ បញ្ហាគំរាមរលូត អាចលេចឡើងនូវរោគសញ្ញាដូចជា
- ការធ្លាក់ឈាមតាមទ្វារមាសតិចតួច
- ការចុកពោះតិចៗ ឬ ការឈឺចាប់ពោះដែលមានសភាពរាងធ្ងន់ចុះក្រោម
- ការឈឺចង្កេះផ្នែកខាងក្រោម
- ការថយចុះ នូវសញ្ញានៃការមានកូន (បាត់ចង្អោរ)
ដូចគ្នានេះផងដែរ បញ្ហាគំរាមរលូត គេអាចធ្វើរោគវិនិច្ឆ័យ តាមរយៈការពិនិត្យអាងត្រគាក
អេកូសាស្រ្ត និង ការពិនិត្យឈាមជាដើម។ល។
៤-ផលវិបាក
ផលវិបាកដែលអាចនឹងកើតមានចំពោះស្ត្រី បន្ទាប់ពីមានបញ្ហាគំរាមរលូតមានដូចជា៖
- ការរបើកសុក
- ការធ្លាក់ឈាមក្រោយសម្រាល
- ការសល់កម្ទេចសុក
- ស្បូនខ្សោយអាចឈានទៅរកការកាត់ស្បូនចោល
- វិបត្តិអត់កូនទៅថ្ងៃក្រោយដោយសារការរំលូត
- ទារកកើតមិនគ្រប់ខែ។
៥-វិធីសាស្រ្តថែទាំ និង ការពារ
ចំពោះវិធីសាស្រ្តក្នុងការពារការគំរាមរលូតគឺមិនមានវិធីសាស្រ្តការពារជាក់លាក់នៅឡើយទេ ប៉ុន្តែយើងអាចថែរក្សាគភ៌ តាមរយៈ៖
- កាត់បន្ថយធ្វើការធ្ងន់ ឬឈោងខ្ពស់ផុតដៃ
- កាត់បន្ថយការធ្វើដំណើរផ្លូវឆ្ងាយ
- បរិភោគអាហារដែលឆ្អិនល្អ និង ជៀសវាង ចំណីអាហារផ្អាប់ ហឹរ
- សម្រាកអោយបានគ្រប់គ្រាន់
- ចៀសវាងការលេបថ្នាំដោយគ្មានវេជ្ជបញ្ជា
- តមរួមភេទជាពិសេសក្នុងកំឡុងត្រីមាសទីមួយ។
ដូចនេះ ស្ត្រីមានផ្ទៃពោះទាំងអស់គប្បីយកចិត្តទុកដាក់ ពិនិត្យតាមដានថែទាំផ្ទៃពោះឱ្យបានទៀងទាត់ ហើយ ប្រសិនបើមានរោគសញ្ញាណាមួយខាងលើ សូមប្រញាប់រួសរាន់ទៅ ពិនិត្យសុខភាពជាមួយក្រុមគ្រូពេទ្យ ដើម្បីកំណត់បាននូវរោគវិនិច្ឆ័យ និងធ្វើការព្យាបាលបានទាន់ពេលវេលា និងប្រកបដោយប្រសិទ្ធភាព។
រៀបចំដោយវេជ្ជ. ភោគ មុនីរង្សី គ្រូពេទ្យទទួលបន្ទុកគ្លីនិក រ៉ាក់ សៀមរាប ឆ្នាំ២០២៣
មតិយោបល់