នៅពេលដែលអ្នកឃើញ​ឈាម​ក្នុង​ទឹកកាម​របស់ខ្លួន ​អ្នក​អាចមាន​ការ​ភ្ញាក់​ផ្អើល។ វាជារឿងកម្រ ប៉ុន្តែវាក៏មិនបង្ហាញពីបញ្ហាធ្ងន់ធ្ងរអ្វីនោះដែរ ជាពិសេសបុរសដែលមានអាយុក្រោមវ័យ ៤០ ឆ្នាំ។ ឈាមក្នុងទឹកកាម (hematospermia) ជាទូទៅ មិនកើតមានរយៈពេលយូរនោះទេ ព្រោះជាធម្មតាវានឹងបាត់ទៅវិញដោយឯកឯង។

មូលហេតុដែលអាចកើតមាននៃឈាមនៅក្នុងទឹកកាម

ទឹកកាមឆ្លងកាត់តាមបំពង់បន្តបន្ទាប់ទៅកាន់បង្ហួរនោមសម្រាប់ការបញ្ចេញទឹកកាម។ វាអាចមានកត្តាមួយចំនួន ដែលបណ្តាលឱ្យសរសៃឈាមនៅតាមផ្លូវនេះបែក និងលេចចេញឈាមចូលទៅក្នុងទឹកកាម។

នៅក្នុងករណីជាច្រើន មូលហេតុពិតប្រាកដនៃឈាមក្នុងទឹកកាមមិនត្រូវបានកំណត់បាននោះទេ។ តែទោះជាយ៉ាងណា នៅពេលដែលមានករណីនេះកើតឡើង ​គ្រូពេទ្យ​អាច​នឹងធ្វើការពិនិត្យស្វែងរកមូលហេតុមួយចំនួនដែលអាចកើតមាន ដូចជា៖

ការរលាក៖ ការរលាកនៃ ថង់ទឺកកាម គឺជាមូលហេតុទូទៅនៃបញ្ហាឈាមក្នុងទឹកកាម។ ការរលាកនៃក្រពេញ បំពង់បង្ហួរនោម ឬសរីរាង្គណាមួយដែលពាក់ព័ន្ធនឹងប្រដាប់បន្តពូជបុរសអាចបណ្តាលឱ្យមានឈាមនៅក្នុងទឹកកាមរបស់អ្នក។ ការរលាកក្រពេញប្រូស្តាត អាចបណ្តាលឱ្យមានការឈឺចាប់ បញ្ហានោម និងអសមត្ថភាពផ្លូវភេទ។

ការរលាកក្រពេញ អេពីឌីឌីម ឬEpididymitis (ឬក្រពេញនៅខាងក្រោយពងស្វាសដែលផ្ទុកមេជីវិតឈ្មោល) ភាគច្រើនបណ្តាលមកពីការឆ្លងចូលនូវមេរោគ ឬបាក់តេរី រួមទាំងការឆ្លងមេរោគតាមផ្លូវបន្តពូជ (STIs) ដូចជាជំងឺពងទឹក ជំងឺប្រមេះទឹកបាយ ឬជំងឺ ប្រមេះទឹកថ្លា។ ប្រសិនបើអ្នកមានការឆ្លងមេរោគតាមផ្លូវបន្តពូជ​ អ្នកអាចមានរោគ​សញ្ញា​ ដូចជា៖ ​ពងស្វាស​ក្រហម ឬ​ហើម ឈឺ​ពងស្វាស ការ​ហូរ​ទឹក​រំអិល និង​ការ​នោម​ឈឺ។

រលាកបង្ហួរនោម ដែលអាចបណ្តាលឱ្យមានការឈឺចាប់ពេលបត់ជើងតូច រមាស់ ឬក្រហាយនៅជិតទរន្ធប្រដាប់ភេទ ឬទឹករំអិលរបស់លិង្គ។ មួយវិញទៀត វាក៏អាចមកពីការរលាកក៏អាចបណ្តាលមកពីមានគ្រួសនៅក្នុងក្រពេញប្រូស្តាត ក្រពេញទឹកកាម ប្លោកនោម ឬបង្ហួរនោម។

ជំងឺឆ្លង៖ ដូចគ្នានឹងការរលាកដែរ ការបង្ករោគនៅក្នុងក្រពេញ បំពង់ ឬសរីរាង្គណាមួយដែលពាក់ព័ន្ធនឹងប្រដាប់បន្តពូជបុរសអាចបណ្តាលឱ្យមានឈាមនៅក្នុងទឹកកាម។ ជំងឺកាមរោគ ដូចជាជំងឺប្រមេះទឹកថ្លា ជំងឺប្រមេះទឹកបាយ ឬជំងឺពងទឹក ក៏អាចបណ្តាលឱ្យមានការរលាក និងមានឈាមនៅក្នុងទឹកកាមផងដែរ។ ការឆ្លងដែលបង្កឡើងដោយមេរោគ បាក់តេរី ឬផ្សិតក៏អាចនាំឱ្យមានស្ថានភាពនេះដែរ។

ការស្ទះ៖ ប្រសិនបើ​បំពង់​ទឹកកាម ​ត្រូវ​បាន​ស្ទះ នោះ​សរសៃឈាម​ជុំវិញ​អាចរីកធំ និង​បែក​បាន។ ប្រសិនបើក្រពេញប្រូស្តាតរបស់អ្នករីកធំ វាអាចដាក់សម្ពាធលើបង្ហួរនោមរបស់អ្នក ដែលអាចបណ្តាលឱ្យមានឈាមក្នុងទឹកកាម។

ដុំសាច់៖ ការដុះដុំសាច់ នៅក្នុងក្រពេញប្រូស្តាត ពងស្វាស អេពីឌីឌីម ឬថង់ទឹកកាម ក៏អាចនាំឱ្យមានឈាមក្នុងទឹកកាមរបស់អ្នកដែរ។

ភាពមិនធម្មតានៃសរសៃឈាម៖ ភាពមិនធម្មតានៃសរសៃឈាមនៅក្នុងប្រដាប់បន្តពូជបុរស ដូចជា គីសសរសៃឈាម អាចធ្វើឱ្យមានឈាមនៅក្នុងទឹកកាមរបស់អ្នកដែរ។

កត្តាផ្សេងៗ៖ លក្ខខណ្ឌដែលប៉ះពាល់ដល់រាងកាយទាំងមូលរបស់អ្នកក៏អាចបណ្តាលឱ្យមានឈាមនៅក្នុងទឹកកាមរបស់អ្នកផងដែរ។ ទាំងនេះរួមមានជំងឺលើសឈាម (សម្ពាធឈាមខ្ពស់) និងជំងឺ hemophilia (ជំងឺដែលនាំឱ្យងាយនិងហូរឈាមច្រើន)។ លទ្ធភាពផ្សេងទៀតរួមមានជំងឺមហារីកឈាម និងជំងឺថ្លើមរ៉ាំរ៉ៃ។

របួស / នីតិវិធីវេជ្ជសាស្រ្ត៖របួស​រាងកាយ ដូចជា​ ប៉ះត្រូវ​​ពងស្វាស​ពេល​លេង​កីឡា អាច​នាំឱ្យ​មាន​ឈាម​ក្នុង​ទឹកកាម​។ របួស​អាច​បណ្តាល​ឱ្យ​សរសៃឈាម​លេច​ធ្លាយ ហើយ​ឈាម​អាច​នឹង​​ចេញពី​ខ្លួន​អ្នក​ទៅក្នុង​ទឹកកាម​។ នីតិវិធីវេជ្ជសាស្រ្តដូចជាការពិនិត្យក្រពេញប្រូស្តាត ឬការធ្វើកោសល្យវិច័យ ឬការវះកាត់សរសៃឈាម ក៏អាចបណ្តាលឱ្យមានឈាមនៅក្នុងទឹកកាមរបស់អ្នកផងដែរ។ 

តើពេលណាត្រូវទៅជួបគ្រូពេទ្យ

អ្នកគួរតែទៅជួបគ្រូពេទ្យដើម្បីស្វែងរកមូលហេតុនៃការមានឈាមក្នុងទឹកកាម ប្រសិនបើអ្នកមានគ្រួសារ ឬប្រវត្តិផ្ទាល់ខ្លួនមានជំងឺមហារីក ឬជំងឺកាមរោគ។ អាយុរបស់អ្នកក៏អាចយោងជាគោលការណ៍ណែនាំផងដែរ។

ប្រសិនបើអ្នកមានអាយុលើសពី 40 ឆ្នាំ

បុរសដែលមានអាយុលើសពី 40 ឆ្នាំមានហានិភ័យខ្ពស់នៃការវិវត្តទៅជាជំងឺដូចជាមហារីកក្រពេញប្រូស្តាត។ ដោយ​សារ​តែ​បញ្ហា​នេះ អ្នក​គួរ​ប្រាប់​គ្រូពេទ្យ​គ្រប់​ពេល​ដែល​អ្នក​ឃើញ​ឈាម​ក្នុង​ទឹកកាម។ គ្រូពេទ្យរបស់អ្នកនឹងពិនិត្យរកមូលហេតុនៃឈាមឱ្យបានឆាប់តាមដែលអាចធ្វើទៅបាន។

ប្រសិនបើអ្នកមានអាយុក្រោម 40 ឆ្នាំ

ប្រសិនបើ​អ្នក​មាន​អាយុ​ក្រោម 40 ឆ្នាំ ហើយ​មិន​មាន​រោគ​សញ្ញា​អ្វី​ក្រៅ​ពី​ទឹកកាម​ចេញ​ឈាម សូម​រង់ចាំ​មើល​ថា​តើ​ឈាម​នឹងបាត់ទៅវិញដោយ​ខ្លួនឯង​ឬ​ទេ​។ ប្រសិនបើ អ្នកបន្តឃើញមានការលាយឈាមក្នុងទឹកកាម ឬប្រសិនបើអ្នកចាប់ផ្តើមមានរោគសញ្ញាបន្ថែមដូចជាការឈឺចាប់ ឬក្តៅខ្លួន សូមធ្វើការណាត់ជួបជាមួយគ្រូពេទ្យរបស់អ្នក។ គ្រូពេទ្យអាចធ្វើការពិនិត្យក្រពេញប្រូស្តាត ឬការវិភាគលើទឹកកាម និងទឹកនោមរបស់អ្នក ដើម្បីកំណត់ប្រភពនៃឈាម។

ប្រភព៖ healthline

ព័តមានបន្តែមអំពីការប្រើប្រាស់ ឬការទទួលសេវាមធ្យោបាយពន្យាកំណើត សូមទាក់ទងមកទូរសព័្ទលេខ៖ 010 812 812, 089 333 990 និង 088 7 107 107